Home Cricket آئی پی ایل میں کس ٹیم کے کون سے کھلاڑیوں کا کورونا...

آئی پی ایل میں کس ٹیم کے کون سے کھلاڑیوں کا کورونا ٹیسٹ مثبت آیا؟ بڑی خبر آگئی

بھارت میں جاری آئی پی ایل بھی کرونا سے متاثر ہونے لگا ہے، جہاں دو کرکٹرز کا کرونا ٹیسٹ مثبت آگیا ہے۔

بھارتی میڈیا رپورٹس کے مطابق کولکتہ نائٹ رائیڈرز کے ورن چکرورتی اور سندیپ ورائر کا کرونا ٹیسٹ مثبت آیا ہے جس کے باعث انڈین پریمئر لیگ (آئی پی ایل) میں آج رات ہونے والا رائل چیلنجرز بنگلور (آر سی بی) اور کولکتہ نائٹ رائیڈرز(کے کے آر) کے مابین ہونے والا میچ کرونا کے بڑھتے کیسز کے باعث ملتوی کردیا گیا ہے۔



بی سی سی آئی کے ایک عہدیدار نے تصدیق کی کہ کے کے آر کے کیمپ میں کرونا کے کیسز پائے جانے کی وجہ سے آر سی بی ان کے خلاف میدان میں اترنے کے خواہشمند نہیں ہے،جس کی وجہ سے آج کے میچ کو ملتوی کردیا گیا ہے۔

واضح رہے کہ بھارت میں کرونا وائرس کے قہر کی وجہ سے آسٹریلوی کھلاڑی اینڈریو ٹائی، کین رچرڈسن اور ایڈم زمپا کے علاوہ آراشون اور دو امپائرز نے بھی آئی پی ایل کو چھوڑ کر جاچکے ہیں، لیگ چھوڑ کر اپنے وطن واپس لوٹنے والے اینڈریو ٹائی نے اعتراض کیا تھا کہ بھارت میں کورونا کے مریضوں کو علاج کے لیے اسپتال نہیں مل رہے تو کمپنیاں اور کارپوریٹ ادارے آئی پی ایل پر اتنا خرچ کیوں کر رہے ہیں؟ جب ملک میں صحت کا نظام اتنا بڑا مسئلہ تھا تو فرنچائز نے کرکٹ پر اتنے پیسے خرچ کیسے کیے؟

ان کا کہنا تھا کہ اگر آئی پی ایل سے لوگوں کے درمیان وبا کا خوف اور پریشانی کم ہورہی ہے تو اسے جاری رکھنا چاہے لیکن بھارتی نقطہ نظر سے دیکھیں تو متعلقہ ادارے، فرنچائز، کمپنیاں اور حکومت ایسے وقت میں کرکٹ پر پیسے خرچ کررہی ہے جب یہاں مریضوں کو علاج کے لیے اسپتال نہیں مل رہے ہیں۔

دوسری جانب بھارت میں کرونا کی بگڑتی صورتحال کے باوجود نجی لیگ کو جاری رکھنے پر منتظمین کو شدید تنقید کاسامنا ہے، میڈیا رپورٹس میں کہا جارہا ہے کہ لیگ کے ملتوی ہونے کے امکانات بڑھ گئے ہیں، لیگ کے ملتوی ہونے کے حوالے سے فی الوقت انڈین کرکٹ بورڈ کی جانب سے کوئی بیان سامنے نہیں آیا ہے۔